Вырошчваем пакаёвыя расліны з мамай
01.04.2019Мы выбралі метад праектаў – адзін з дзейсных спосабаў арганізацыі калектыўнай пазнавальнай і творчай дзейнасці. Праект «Вырасцім пакаёвую расліну разам з мамай», які вырашае пэўныя задачы прадметаў «Асновы жыццядзейнасці» і «Гаспадарча-бытавая праца», далучае бацькоў да сумеснай практычнай дзейнасці з дзецьмі па вырошчванні пакаёвых раслін для ўпрыгажэння інтэр'еру і класаў ЦКРНіР, фарміруе экалагічную культуру ў выхаванцаў.
Работа над праектам складалася з некалькіх этапаў. Спачатку педагогі расказалі бацькам пра яго значнасць і спосабы рэалізацыі, высветлілі магчымасці і пажаданні кожнай сям'і. Затым азнаёмілі бацькоў з літаратурай пра пакаёвыя расліны і тэхналогіяй іх вырошчвання. Шмат цікавага бацькі даведаліся падчас віктарыны «Што вы ведаеце пра пакаёвыя расліны?» і тэматычнай гутаркі «Карысныя ўласцівасці пакаёвых раслін». Быў паказаны класны куток «Нашы зялёныя сябры».
У рамках праекта бацькі і дзеці наведалі краму «Кветкі» і аднайменную выставу творчых работ у Ляхавіцкім тэрытарыяльным цэнтры сацыяльнага абслугоўвання насельніцтва.
Пасля падрыхтоўчага этапу бацькі, абапіраючыся на ўласныя веды і практычны вопыт, пачалі працаваць з дзецьмі. Падчас рэалізацыі праекта мамы кансультаваліся з педагогамі наконт выбару віду пакаёвай расліны, ёмістасці для яе і глебавай сумесі, тэхналогіі пасадкі і догляду, назірання за ростам і развіццём, прэзентацыі зялёных гадаванцаў і выканання творчых работ.
Дзеці з цікавасцю вырошчвалі і даглядалі кветкі ў дамашніх умовах.
Завяршыўся праект выставай творчых работ «Мая кветка» і паказам зялёных гадаванцаў. Усе ўдзельнікі праекта атрымалі вялікае задавальненне ад сумеснай дзейнасці і гатовы да ажыццяўлення новых задум.
Наталія ДЫЛЕЎСКАЯ,
настаўнік-дэфектолаг Ляхавіцкага раённага ЦКРНіР.