Майстры сваёй справы

- За доўгія гады існавання конкурс “Настаўнік года”, накіраваны на выяўленне, абагульненне і распаўсюджванне перадавога педагагічнага вопыту, павышэнне прафесійнай кампетэнтнасці творчых настаўнікаў і выхавальнікаў, стаў не толькі вельмі папулярным і запатрабаваным, але і сапраўднай школай педмайстэрства, - расказаў начальнік раённага аддзела па адукацыі В.В.Гаўрыловіч. – На Піншчыне спаборніцтва мае свае традыцыі. Так, сімвалам раённага конкурсу з’яўляецца сініца, якая ўвасабляе працу, мастацтва і творчасць.

Па словах загадчыцы раённага ВМК А.Я.Шпакоўскай, спаборніцтва праходзіла ў 2 этапы. Канкурсанты праводзілі адкрытыя ўрокі, у тым ліку ў незнаёмых класах, прэзентавалі вопыт педагагічнай дзейнасці, праходзілі псіхолага-педагагічнае тэсціраванне. У фінал выйшлі выхавальніца Юлія Анатольеўна Савіцкая з Пінкавіцкага ясляў-сада, настаўнік фізічнай культуры і здароўя Руслан Мікалаевіч Голікаў з Кашэвіцкай сярэдняй школы, настаўнік геаграфіі Дзмітрый Мікалаевіч Козак з Жыдчанскай сярэдняй школы, настаўніца англійскай мовы Алена Уладзіміраўна Чалей са Ставоцкай сярэдняй школы, настаўнік хіміі і біялогіі Мікалай Канстанцінавіч Прыгодзіч з Малоткавіцкай сярэдняй школы, настаўніца пачатковых класаў Ірына Віктараўна Ларыёнава і настаўніца матэматыкі Святлана Іванаўна Кандзярэшка з Пінкавіцкай сярэдняй школы імя Якуба Коласа, а таксама настаўніца рускай мовы і літаратуры Людміла Мікалаеўна Пракопчык з Гарадзішчанскай сярэдняй школы. Фіналісты рабілі творчую самапрэзентацыю і знаёмілі журы з уласным педагагічным вопытам.

Па выніках усіх конкурсных выпрабаванняў лепшай аказалася настаўніца матэматыкі С.І.Кандзярэшка з Пінкавіцкай сярэдняй школы імя Якуба Коласа. На 2-м месцы – выхавальніца Ю.А.Савіцкая з Пінкавіцкага ясляў-сада, на 3-м – настаўніца пачатковых класаў І.В.Ларыёнава з Пінкавіцкай сярэдняй школы імя Якуба Коласа. Пераможцы атрымалі каштоўныя падарункі ад раённага аддзела па адукацыі, раённых арганізацый БРСМ, “Белай Русі” і галіновага прафсаюза. Але лепшай узнагародай для ўдзельнікаў з’яўляюцца павага калег, любоў вучняў і давер іх бацькоў.   

Сёлета на Піншчыне была створана кніга гонару “Залаты настаўніцкі фонд Пінскага раёна” з інфармацыяй пра фіналістаў раённых этапаў Рэспубліканскага конкурсу прафесійнага майстэрства педагогаў “Настаўнік года”. Кніга будзе захоўвацца ў музеі адукацыі Пінскага раёна.

Сяргей ГРЫШКЕВІЧ.