Школа мужнасці і патрыятызму
04.04.2017Каля манумента “Мужнасць” у Брэсцкай крэпасці-героі гарыць Вечны агонь. На працягу 45 гадоў ля яго нясуць Вахту Памяці вучні ўстаноў адукацыі горада.
- Для моладзі Брэста Пост Памяці з’яўляецца школай мужнасці і патрыятызму, усвядомленым грамадзянскім абавязкам перад Радзімай і тымі, хто загінуў у час Вялікай Айчыннай вайны, - расказаў начальнік аддзела адукацыі, спорту і турызму Брэсцкага гарвыканкама А.М.Наскоў. – Праз ваенна-патрыятычную школу Паста Памяці прайшло не адно пакаленне брэстаўчан – больш за 91 тысячу старшакласнікаў. Сёння Пост Памяці з’яўляецца структурным падраздзяленнем Цэнтра дадатковай адукацыі дзяцей і моладзі Брэста.
Юнармейцаў чакала даволі насычаная праграма. Арганізатары чатырохдзённага злёту пастараліся зрабіць знаходжанне гасцей на брэсцкай зямлі цікавым і незабыўным.
Пасля знаёмства дэлегацый і ўрачыстага мітынгу ў мемарыяльным комплексе “Брэсцкая крэпасць-герой” удзельнікі злёту неслі міжнародную Вахту Памяці, пасля чаго для іх была арганізавана экскурсійная праграма па мемарыяле і Нацыянальным парку “Белавежская пушча”.
Падчас сустрэчы са старшынёй Брэсцкага гарвыканкама А.С.Рагачуком удзельнікі злёту даведаліся пра мерапрыемствы, прысвечаныя будучаму святкаванню 1000-годдзя горада, падзяліліся ўражаннямі ад яго і расказалі пра грамадзянска-патрыятычны рух моладзі ў сваіх населеных пунктах: дзейнасць Пастоў Памяці, патрыятычных клубаў, кадэцкіх класаў і інш.
- Брэст заўсёды з вялікай павагай адносіўся да патрыятычных ініцыятыў, звязаных з гераічным мінулым краіны. Вельмі добра, калі нас аб’ядноўваюць агульная гісторыя і шчырыя намаганні па яе захаванні і ўвекавечанні, асабліва сярод моладзі, - адзначыў А.С.Рагачук.
У рамках злёту адбыліся міжнародная педагагічная канферэнцыя “Педагогі за мір і ўзаемаразуменне: тэорыя і вопыт міратворчага руху і фарміравання талерантнасці ў навучэнцкай моладзі ў інтарэсах падтрымання міру на зямлі”, патрыятычная гульня з юнармейцамі “Сцяг
Перамогі” і экскурсіі на пагранічную заставу імя Героя Савецкага Саюза А.М.Кіжаватава і ў музей Брэсцкага пагранатрада.
Сяргей ГРЫШКЕВІЧ.