Англійская мова з дзіцячага садка – гэта здорава!

02.04.2016
- Дарослыя даўно спрачаюцца наконт таго, з якога ўзросту дзецям лепш за ўсё вывучаць замежную мову, - гаворыць дырэктар дзіцячага сада – пачатковай школы № 1 Брэста Таццяна Аляксееўна Мосіна. – Малышы ахвотна імкнуцца размаўляць і схопліваюць словы злёту, у выніку чаго авалодваюць мовай без вялікіх намаганняў. Гэта звязана з псіхалагічнымі асаблівасцямі дзіцячага ўзросту – непасрэднасцю ўспрымання, адкрытымі адносінамі да людзей, здольнасцю імгненна засвойваць пэўную інфармацыю і нормы паводзін. Яшчэ К.Д.Ушынскі пісаў, што “дзіця навучаецца ў некалькі месяцаў так гаварыць на замежнай мове, як не можа навучыцца ў некалькі гадоў”.

Т.А.Мосіна лічыць, што паспяховаму авалоданню замежнай мовай дашкольнікам вельмі добра дапамагае тэатр, які з’яўляецца адным з самых яркіх, маляўнічых і даступных для дзіцячага ўспрымання сфер мастацтва. Тэатр прыносіць радасць, развівае ўяўленне і фантазію, садзейнічае станаўленню асобы, стварае станоўчы эмацыянальны фон, робіць жыццё багацейшым і разнастайным.

– Патрэба ў тэатральных уражаннях у дзяцей надзвычай вялікая, бо тэатр – гэта заўсёды свята, - адзначае Т.А.Мосіна.

– У параўнанні з іншымі відамі мастацтва ён валодае асаблівай сілай уздзеяння на малышоў. Толькі ў тэатры яны судакранаюцца з мастаком, які творыць на вачах. У дзяцей, якія ўдзельнічаюць у тэатральных пастаноўках, павышаецца інтарэс да заняткаў, абуджаюцца думкі, фантазіі, эмоцыі.

Усе дзеці цікавыя і ўсе розныя. Дапамагчы ім праявіць сваю індывідуальнасць і захаваць яе – асноўная задача дзіцячага тэатра. Тэатральная дзейнасць развівае дасціпнасць і творчае ўяўленне, абуджае інтарэс да творчасці.

– Пачынаючы вывучаць з дашкольнікамі замежную мову, вельмі важна далучыць іх да тэатра, - упэўнена Т.А.Мосіна. – Першымі тэатральнымі пастаноўкамі, з якімі пазнаёмяцца дзеці, павінны быць спектаклі-казкі. Свет казкі, вясёлай, хітрай, мудрай і паэтычнай, адкрывае малышам першую радасць перамогі дабра над злом, абуджае фантазію, развівае ўяўленне.

Ва ўстанове адукацыі дзіцячы музычны тэатр на замежнай мове існуе каля 20 гадоў. Кіраўніком тэатра з’яўляецца настаўніца англійскай мовы Т.А.Мосіна. На яго пастаноўках вырасла не адно пакаленне дзяцей. Кожны згадвае першыя тэатральныя дэбюты з вялікай радасцю.

У тэатры займаюцца пераважна малодшыя школьнікі. У бягучым навучальным годзе да іх далучыліся і дашкольнікі, якія ўпершыню прынялі ўдзел у вялікім тэатральным свяце “Казачны серпанцін”. Бацькі, запрошаныя на мерапрыемства, высока ацанілі намаганні сваіх дзяцей.

– Тэатр у нашай установе – гэта цэлае жыццё, - гаворыць Т.А.Мосіна. – З дзецьмі працуе вялікі калектыў творчых педагогаў. Сярод іх – музычны кіраўнік Ірына Анатольеўна Філосаф, харэограф Надзея Васільеўна Перамотава і выкладчыца вакалу Наталля Яўгенаўна Карнялюк.

Падрыхтоўкай тэатральных касцюмаў і дэкарацый займаецца Алена Генадзьеўна Гарошка. Зладжаная дзейнасць калектыву аднадумцаў дазваляе дасягнуць добрых вынікаў: дапамагае раскрыць патэнцыял кожнага дзіцяці, зрабіць вывучэнне англійскай мовы важным, цікавым і захапляльным заняткам. Работа з дзецьмі над спектаклем дазваляе выкарыстоўваць веды і навыкі зносін у розных сітуацыях, развівае партнёрскія стасункі.

Значэнне пастановак для навучэння мове неацэннае. Пры выбары сцэнарыя для дашкольнікаў, якія вывучаюць англійскую мову, важна, каб яго тэкст змяшчаў пераважна знаёмы моўны і маўленчы матэрыял. У выніку гэтага работа дашкольнікаў над спектаклем становіцца яшчэ больш цікавай і захапляльнай. Падчас тэатральнай дзейнасці дзеці разумеюць, што яны адначасова вывучаюць замежную мову. Ім гэта цікава, яны гэтаму рады, таму ўпэўнены ў сваіх сілах.

– Спектакль у дзіцячым садку ставіцца галоўным чынам для саміх малышоў, для таго, каб ім было весела ці сумна, камфортна ці нязручна, каб яны навучыліся таму, чаго яшчэ не ўмеюць, адкрылі ў сабе тое, што да пэўнага часу было схавана ад іншых людзей і іх саміх, - падагульняе Т.А.Мосіна.

Сяргей ГРЫШКЕВІЧ.