“Ад абака да камп’ютара”

18.01.2016
Пад такой назвай у Ліноўскай сярэдняй школе Пружанскага раёна працуе выстава экспанатаў музея гісторыі развіцця вылічальнай тэхнікі.

- Ідэя стварыць музей узнікла ў 2004 годзе, а першыя экспанаты з’явіліся яшчэ ў 1994-м: лічыльнікі, лагарыфмічная лінейка, арыфмометр “Фелікс М”, вылічальная машына ВМП-2 і інш., - расказвае кіраўнік музея настаўнік інфарматыкі А.І.Гук. – Паступова збіраліся новыя экспанаты. Музейны фонд папаўняўся дзякуючы ўласным сродкам, падтрымцы вучняў, сяброў, калег і неабыякавых да майго захаплення людзей.

Больш за 100 экспанатаў дазваляюць, няхай і ў няпоўнай ступені, аднавіць гісторыю развіцця сусветнай і айчыннай вылічальнай тэхнікі – ад прасцейшых да высокатэхналагічных прылад, аб’яднаных па раздзелах “Устройствы ліку” (макет абака, лічыльнікі, лагарыфмічныя лінейкі), “Механічныя вылічальныя ўстройствы” (арыфмометры), “Электрамеханічныя вылічальныя ўстройствы” (вылічальныя дзесяціклавішныя і мнагаклавішныя машыны), “ЭВМ” (дыскеты, магнітныя стужкі і мадэмы вытворчасці ГДР), “Камп’ютары, камплектуючыя і перыферыя” (персанальныя камп’ютары, ноўтбукі і прынтары мінулага стагоддзя), “Калькулятары” (1970 – 1990-ыя гады) і “Гульнявыя прыстаўкі”. З усімі экспанатамі можна азнаёміцца на школьным сайце.

- Дзеці з вялікім інтарэсам вывучаюць вылічальную тэхніку мінулага. Музейныя экспанаты актыўна выкарыстоўваюцца на ўроках і ў пазаўрочнай дзейнасці, - гаворыць А.І.Гук.

Сяргей ГРЫШКЕВІЧ.