Ставіць мэту і дасягаць яе
30.11.2015З ранняга дзяцінства дзесяцікласніцу Настассю Пузікаву з гімназіі № 2 Баранавіч прыцягвала навука, найперш сваімі загадкамі і таямніцамі. У 4 класе дзяўчына ўпершыню выйграла гарадскую алімпіяду па рускай мове і атрымала дыплом І ступені на навукова-практычнай канферэнцыі за работу “Мой дзед – салдат Перамогі”. У наступных класах былі перамогі на гарадскіх алімпіядах па матэматыцы, фізіцы, інфарматыцы, англійскай, рускай і беларускай мовах, прызавыя месцы на навукова-практычных канферэнцыях рознага ўзроўню па матэматыцы і рускай мове.
У мінулым навучальным годзе Настасся атрымала дыпломы І ступені на ўсіх этапах Рэспубліканскай алімпіяды па рускай мове і літаратуры. За гэта дзяўчына была ўзнагароджана вучэбна-адукацыйнай паездкай у Санкт-Пецярбург, арганізаванай Федэральным агенцтвам па справах СНД. У рамках міжнароднай праграмы “Духоўныя вытокі сучаснай Расіі” баранавіцкая школьніца ўпершыню наведала паўночную сталіцу Расіі, азнаёмілася з яе славутымі мясцінамі, сустрэлася з равеснікамі з 10 краін Еўропы і Азіі, а на святочнай вечарыне прадставіла Беларусь, выканаўшы песню “Сэрца Беларусі”.
Нядаўна Настасся ўдзельнічала ў заключным этапе Х алімпіяды школьнікаў Саюзнай дзяржавы па рускай мове і літаратуры “Расія і Беларусь: гістарычная і духоўная еднасць”, якая праходзіла ў Гомелі. Па выніках спаборніцтва, дзе мераліся сіламі амаль 200 старшакласнікаў з Расіі і Беларусі, дзяўчына атрымала дыплом ІІ ступені. Алімпіяда складалася з напісання сачынення і выканання комплекснай работы па рускай мове і літаратуры, творчых конкурсаў рытарычнага майстэрства і выразнага літаратурнага чытання, а таксама лінгвістычнай віктарыны.
- Для таго каб перамагаць у алімпіядах такога ўзроўню, неабходна валодаць дастатковым багажом ведаў не толькі па рускай мове, але і па літаратуры і гісторыі, - адзначае Настасся. – А галоўнае – пастаянна працаваць над сабой, рабіць маленькія адкрыцці і вельмі хацець дасягнуць высокага выніку. Трэба ставіць перад сабой мэту і кожны дзень паціху набліжацца да яе. Лічу сябе шчаслівым чалавекам, бо побач са мной родныя, сябры і настаўнікі, якія заўсёды падтрымліваюць і дапамагаюць самарэалізавацца. Шкадую толькі аб тым, што, на жаль, на ўсё не хапае часу.
Поспехі Настассі не выпадковыя. За імі стаяць не толькі глыбокія веды, талент, настойлівасць, упартасць і барацьба дзяўчыны, але і сістэмная і карпатлівая работа настаўніцы рускай мовы і літаратуры гімназіі № 2 Баранавіч С.А.Пузікавай.
Ала МАМОНЧЫК,
метадыст вучэбна-метадычнага кабінета Баранавіч.