Лепшая прафесія – быць чалавекам!
З верасня мінулага года ў нашай установе стартаваў праект па арганізацыі шостага школьнага дня “Прафесійны тандэм: сям’я і школа”. Мэта праекта – папулярызацыя запатрабаваных у нашым рэгіёне прафесій праз узаемадзеянне з бацькоўскай грамадскасцю. Актуальнасць праекта выклікана тым, што нашы выпускнікі неахвотна выбіраюць спецыяльнасці, неабходныя эканоміцы Бярозаўшчыны, якая з’яўляецца адным з найбольш індустрыяльна развітых раёнаў Брэстчыны.
Аўтары праекта – намеснік дырэктара па выхаваўчай рабоце А.М.Іваноўская і сацыяльны педагог І.М.Васілечка. Рашэнне аб рэалізацыі праекта па суботах абумоўлена тым, што сучаснай школе неабходны эфектыўныя падыходы да арганізацыі выхаваўчай прасторы дзяцей у вольны час і актывізацыі канструктыўнага ўзаемадзеяння з бацькамі.
Праект складаецца з трох этапаў. Падчас падрыхтоўчага этапу сфарміравалася ініцыятыўная група з ліку педагогаў і бацькоў, былі падрыхтаваны інфармацыйныя матэрыялы, аформлены прафарыентацыйныя буклеты, вызначаны асноўныя формы работы з вучнямі і бацькамі, спланавана работа з партнёрамі праекта, праведзена анкетаванне вучняў 9 – 11 класаў “Запатрабаваныя прафесіі рэгіёна: што я пра іх ведаю”.
Самым насычаным атрымаўся асноўны этап праекта. На працягу некалькіх месяцаў бацькі вучняў 1 – 11 класаў праводзілі для дзяцей прафарыентацыйныя мерапрыемствы, заняткі, сустрэчы і экскурсіі: “Крама: хто ў ёй працуе”, “А дарога шэраю стужкаю ўецца...”, “Лячыць людзей – высакародная справа”, “Мой тата ветэрынар”, “Я б у зваршчыкі пайшоў, няхай мяне навучаць” і інш. Завяршальным мерапрыемствам асноўнага этапу праекта стаў прафарыентацыйны гала-канцэрт “Лепшая прафесія – быць чалавекам!” для вучняў 5 – 11 класаў. На канцэрце гучалі дзіцячыя кампазіцыі і песні з кінафільмаў: “Песня шафёра”, “Марш вышыннікаў”, “Опера”, “Прадавец парасонаў” і інш. Гледачоў радавалі тэатралізаваныя выступленні юных цырульнікаў, леснікоў і пілотаў. Завяршыла канцэртную праграму музычная кампазіцыя “Галоўная прафесія – быць чалавекам!”. Лепшыя ўдзельнікі атрымалі падзякі з рук кіраўніцтва сельсавета і дырэктара ясляў-сада – сярэдняй школы І.А.Зялёнкі.
На заключным этапе праекта будуць падведзены яго вынікі.
Ірына ВАСІЛЕЧКА,
сацыяльны педагог Першамайскага ясляў-сада – сярэдняй школы Бярозаўскага раёна.
