Аднадумцы і сябры
06.06.2018Работа з адоранымі вучнямі ў любой установе адукацыі пачынаецца з пошуку здольных дзяцей, якія даволі часта праяўляюць сябе ўжо ў пачатковых класах. Не апошнюю ролю ў гэтым адыгрывае алімпіядны рух. Галоўнае – накіраваць інтарэсы вучняў у карыснае рэчышча і правільна іх матываваць. Дзесяцікласніцы Таццяне Петрашэвіч з сярэдняй школы № 21 Баранавіч вельмі пашанцавала сустрэць педагога, які своечасова заўважыў і дапамог развіць здольнасці дзяўчынкі. Пад кіраўніцтвам настаўніцы рускай мовы і літаратуры Таццяны Віктараўны Конанавай вучаніца паспяхова ўдзельнічае ў алімпіядным руху. Так, на ўсіх трох этапах сёлетняй Рэспубліканскай алімпіяды па рускай мове і літаратуры дзяўчына атрымала дыпломы І ступені. Акрамя таго, Таццяна была адзначана спецыяльным прызам Міністэрства адукацыі Беларусі за самы высокі бал па выніках усіх алімпіядных выпрабаванняў сярод вучняў 9 – 11 класаў.
У чым сакрэт поспеху здольнай школьніцы? Ужо з 5 класа яна вызначалася стараннасцю і працавітасцю. Таццяна шмат чытала, вучылася з захапленнем, актыўна ўдзельнічала ў творчых конкурсах па літаратуры, паказвала глыбокія веды ў алімпіядах па рускай і беларускай мовах і літаратуры, гісторыі і грамадазнаўстве, хіміі. У 8 класе дзяўчынка атрымала дыплом І ступені ў абласным этапе Рэспубліканскай алімпіяды па рускай мове і літаратуры. Дасягнуць такога выніку было складана, але Таццяна справілася, паколькі побач з ёй быў надзейны памочнік і дарадца – творчы і таленавіты педагог Т.В.Конанава, якая любіць сваю прафесію і свой прадмет, прывівае любоў да чытання ўласным прыкладам. Таццяна Віктараўна не дазваляе сабе ленавацца, заўсёды адкрыта для дыялогу і чула прыслухоўваецца да меркаванняў калег. Па словах настаўніцы, яе выхаванка ўжо ў 8 класе выдатна ведала вучэбную праграму базавага ўзроўню. Асабліва Таццяна любіла выконваць заданні па самых складаных і цікавых раздзелах – сінтаксісе і словаўтварэнні.
З 9 класа вучаніца пад кіраўніцтвам Т.В.Конанавай надзвычай сур’ёзна рыхтавалася да кожнага інтэлектуальнага марафону, які ўключаў лінгвістычны, рытарскі і творчы конкурсы. Таццяна вывучала гісторыю рускай мовы і работы вядомых лінгвістаў, паглыбляла веды па гісторыі і тэорыі літаратуры, трэніравалася ў напісанні водгукаў, рыхтавала вусныя выказванні на розныя тэмы. Настаўніца і дзяўчынка працавалі натхнёна і мэтанакіравана. Было адначасова і цяжка, і цікава. Педагогу вельмі падабалася, што ёй сустрэлася не толькі адказная, добрасумленная і дасведчаная вучаніца, але і сапраўдны аднадумец, які шмат умее і здольны самастойна працаваць. Намаганні настаўніцы і дзяўчынкі прывялі да заканамернай перамогі ў заключным этапе рэспубліканскай прадметнай алімпіяды.
Т.В.Конанава любіць дзяцей такімі, якія яны ёсць, паважае ў кожным асобу, імкнецца разгледзець у іх маленькія сонейкі. Таццяна Віктараўна лічыць, што школа дазваляе праявіць сябе праз сваіх выхаванцаў. Жыццёвым крэда педагога з’яўляюцца словы Л.М.Талстога: “Не верце словам ні сваім, ні чужым, верце толькі справам і сваім, і чужым”.
Дзеці растуць разам з настаўнікамі, а настаўнікі – разам з дзецьмі як педагогі. Робяць крок за крокам, узнімаючыся па прыступках і дасягаючы пэўных мэт і вышынь. Задача педагога – не толькі навучыць вучыцца, але стаць людзьмі, удумлівымі, чулымі, гатовымі прыйсці на дапамогу.
Ад дзіцячых поспехаў вырастаюць крылы і ў настаўнікаў, якія атрымліваюць імпульс да далейшага самаразвіцця. Педагогі, не прапусціце сваіх геніяў!
Ала МАМОНЧЫК,
метадыст вучэбна-метадычнага кабінета Баранавіч.