Калейдаскоп школьнага жыцця
На працягу 15 гадоў у сярэдняй школе № 3 Івацэвіч выходзіць газета “Перапынак”, стваральнікам і кіраўніком якой з’яўляецца настаўніца інфарматыкі Людміла Мікалаеўна Бахур. На штотыднёвых сходах рэдкалегіі вызначаецца тэматыка будучых нумароў, уводзяцца новыя і замацоўваюцца асноўныя рубрыкі за пэўнымі журналістамі, размяркоўваюцца заданні для юнкараў і мастакоў, зацвярджаюцца пытанні для статыстычных апытанняў і інш. Вучні з цікавасцю сочаць за кожным выпускам газеты.
5 гадоў у школе пад кіраўніцтвам настаўніцы інфарматыкі Вікторыі Сяргееўны Шатавай дзейнічае тэлекампанія “Стоп-кадр”, якая рыхтуе штомесячныя выпускі навін. У іх адлюстроўваюцца яркія моманты школьнага жыцця: святы, сустрэчы, вечарыны, акцыі, канцэрты, конкурсы, інтэрв’ю з педагогамі і вучнямі і інш.
- У аснове работы тэлекампаніі – праектная дзейнасць школьнікаў, якая дазваляе фарміраваць іх актыўную, самастойную і ініцыятыўную пазіцыю па розных пытаннях, важныя ўменні і кампетэнцыі, развіваць пазнавальныя інтарэсы, - расказвае В.С.Шатава. – Усю работу над падрыхтоўкай тэлематэрыялаў ажыццяўляюць вучні. Педагогі выконваюць ролю куратараў і памочнікаў.
Кожны навучальны год у складзе школьнай тэлекампаніі працуюць 12 чалавек з ліку вучняў 7 – 10 класаў: вядучыя, карэспандэнты, дыктары, аператары і мантажоры. Працуючы над рэальным тэлевізійным прадуктам, дзеці адначасова авалодваюць пэўнымі прафесійнымі навыкамі. Калектыўныя работа з часавымі абмежаваннямі накладвае на вучняў вялікую адказнасць за выкананне ўзятых абавязацельстваў. Але дзеці паспяхова з імі спраўляюцца.
У бягучым навучальным годзе змяніліся праграма і падыходы да выпускаў школьных навін, да якіх далучыліся новыя вучні. Школьнае тэлебачанне ў пастаянным пошуку новага і цікавага.
Сяргей ГРЫШКЕВІЧ.
