У цэнтры ўвагі – здароўе і бяспека дзяцей

Галоўны спецыяліст аддзела тэхнічнага нагляду пры абласным упраўленні адукацыі В.П.Хутко расказаў, што ва ўстановах адукацыі Брэстчыны праводзіцца работа па стварэнні бяспечных умоў працы і вучобы, прафілактыцы вытворчага і дзіцячага траўматызму. Тым не менш праверкі выяўляюць розныя недахопы ў гэтай дзейнасці. Так, адзначаюцца выпадкі, калі да работ з павышанай небяспекай дапускаюцца людзі без праверкі ведаў па пытаннях аховы працы і афармлення допуску. Па-ранейшаму работнікі не ў поўным аб’ёме забяспечваюцца сродкамі індывідуальнай абароны ў адпаведнасці з зацверджанымі нормамі. Амаль паўсюль не выдаецца абутак работнікам харчаблокаў і зімовае адзенне. Сёлета ва ўстановах адукацыі вобласці здарыліся 2 няшчасныя выпадкі з работнікамі.

У дзіцячых садах і школах арганізаваны прапускны рэжым. Педагогі рэгулярна нагадваюць дзецям правілы бяспечных паводзін на вуліцы і дарозе, у грамадскім транспарце, на вадаёме, у лесе, пры маланцы, а таксама правілы пажарнай і электрабяспекі. Асаблівая ўвага ўдзяляецца прафілактыцы дзіцячага дарожна-транспартнага траўматызму. Так, 587 устаноў адукацыі вобласці абсталяваны пляцоўкамі па практычным вывучэнні правіл дарожнага руху. Ва ўсіх школах працуюць атрады юіраўцаў. Дзеці рэгулярна сустракаюцца з супрацоўнікамі ДАІ падчас прафілактычных мерапрыемстваў. Нягледзячы на работу па папярэджанні дарожна-транспартных здарэнняў, сёлета ў вобласці былі зарэгістраваны 42 ДТЗ з удзелам непаўналетніх.

Павышанай увагі патрабуе работа па арганізацыі бяспечных паводзін дзяцей на вадзе (сёлета патанулі 7 непаўналетніх). У рамках школьнай праграмы павялічана колькасць гадзін для навучання плаванню.

Сёлета падчас адукацыйнага працэсу адбыліся 66 няшчасных выпадкаў з дзецьмі, прычым амаль ва ўсіх раёнах вобласці. Па-ранейшаму шмат траўм рэгіструецца на перапынках і ўроках фізкультуры.

- Чаму ва ўстановах адукацыі не забяспечаны належны парадак па захаванні здароўя дзяцей? Што неабходна зрабіць, каб адчувальна палепшыць сітуацыю з траўматызмам і выкананнем правіл тэхнікі бяспекі? Рэцэпт просты: павысіць уласную адказнасць. Бо адна з галоўных прычын сумнай статыстыкі заключаецца ў аслабленым кантролі за дзецьмі з боку педагогаў, а за педагогамі – з боку кіраўнікоў, - адзначыў начальнік абласнога ўпраўлення адукацыі Ю.М.Прасмыцкі.

- Харчаванне ў агульнаадукацыйных установах, дзе дзеці праводзяць большую частку часу, займае важнае месца ў сістэме захавання і ўмацавання здароўя, а таксама эфектыўнасці навучання, - расказала галоўны спецыяліст аддзела тэхнічнага нагляду пры абласным упраўленні адукацыі А.А.Белаш. – 96% гарадскіх і 100% сельскіх школьнікаў ахоплены гарачым харчаваннем. У Брэсце, Брэсцкім і Бярозаўскім раёнах гэты паказчык не перавышае 88%. Рэгулярна ацэньваецца стан тэхналагічнага і халадзільнага абсталявання ў харчаблоках, карэкціруюцца прыкладныя рацыёны харчавання ў адпаведнасці з вытворчымі магчымасцямі. Умацоўваецца матэрыяльна-тэхнічная база харчаблокаў. Усе ўстановы адукацыі ўкамплектаваны кухарамі. Вялікая ўвага ўдзяляецца павышэнню ўзроўню санітарна-гігіенічнай культуры работнікаў харчаблокаў.

Фарміраванне культуры здаровага харчавання ў дзяцей – адзін з важных напрамкаў работы ўстаноў адукацыі. З гэтай мэтай праводзяцца тэматычныя класныя гадзіны, канферэнцыі, дыскусіі і дыспуты, бацькоўскія сходы з удзелам работнікаў камбінатаў школьнага харчавання. Для павелічэння ахопу харчаваннем прымяняюцца прагрэсіўныя формы абслугоўвання.

Нягледзячы на работу па арганізацыі здаровага харчавання і бяспечнага функцыянавання харчаблокаў, вынікі нядаўніх праверак дзяржсаннагляду паказалі, што вытворчы кантроль за якасцю і бяспекай прадуктовай сыравіны і харчовых прадуктаў ва ўстановах адукацыі знаходзіцца не на належным узроўні. У 90% правераных устаноў выяўлены парушэнні патрабаванняў санітарных норм на харчаблоках. Больш за ўсё іх у Брэсце, Кобрынскім, Ляхавіцкім, Лунінецкім, Брэсцкім і Пружанскім раёнах. Менш за ўсё – у Бярозаўскім раёне.

- Патрабуецца сур’ёзная работа па паляпшэнні санітарнага і тэхнічнага стану харчаблокаў устаноў адукацыі, павышэнні кваліфікацыі і вытворчай культуры іх работнікаў. Арганізацыя бяспечнага харчавання павінна быць у цэнтры павышанай увагі кіраўнікоў, бо за гэтым стаіць здароўе дзяцей, - заўважыў Ю.М.Прасмыцкі.

Сяргей ГРЫШКЕВІЧ.