Эфектыўныя і паспяховыя

- Конкурс праводзіўся з мэтай павышэння эфектыўнасці кіраўніцкай дзейнасці дырэктараў устаноў прафесійнай адукацыі, - расказаў старшыня журы конкурсу першы намеснік начальніка галоўнага ўпраўлення па адукацыі аблвыканкама А.Ф.Жук. – Спаборніцтва – добрая магчымасць для развіцця творчых і прафесійных кампетэнцый кіраўнікоў, выяўлення і распаўсюджвання эфектыўнага кіраўніцкага вопыту, фарміравання пазітыўнага іміджу кіраўнікоў.

Конкурс праводзіўся пад дэвізам “Эфектыўнае кіраванне – гарантыя якасці адукацыі” і складаўся з двух этапаў – завочнага і вочнага. Удзельнікі першага этапу рыхтавалі выніковыя матэрыялы абласнога конкурсу на лепшую ўстанову прафесійнай адукацыі, стваралі відэаролікі на тэму “Мая малая радзіма” і афармлялі паспяховы кіраўніцкі вопыт у выглядзе партфоліа. Пераможцамі завочнага этапу сталі Святлана Уладзіміраўна Шышына з Баранавіцкага дзяржаўнага ПТК сферы абслугоўвання, Аляксандр Пятровіч Юшчук з Кобрынскага дзяржаўнага політэхнічнага каледжа, Васіль Васільевіч Нагурны з Абласнога аграрна-вытворчага прафесійнага ліцэя Драгічына, Мікалай Віктаравіч Новак з Пінскага дзяржаўнага ПТК лёгкай прамысловасці і Сяргей Фёдаравіч Палхоўскі з Пінскага дзяржаўнага ПТК машынабудавання. Гэтыя кіраўнікі сустрэліся ў заключным этапе конкурсу, які праходзіў у Брэсцкім дзяржаўным каледжы сувязі. Фіналісты рыхтавалі візітоўкі сваіх устаноў, паказвалі майстар-класы па розных рабочых прафесіях, выступалі ў ролі мастакоў, сачынялі з прапанаваных фраз вершы пра прафесійную адукацыю, спаборнічалі ў веданні мелодый, удзельнічалі ў інтэлектуальным шоу, імправізавалі ў пэўных жыццёвых сітуацыях і вызначалі лепшага капітана КВЗ.

- Стратэгія развіцця каледжа і майго самаразвіцця як кіраўніка распрацоўваецца з улікам інтарэсаў навучэнцаў, іх бацькоў, педагогаў і заказчыкаў кадраў. План дзейнасці павінен быць значным не толькі для ўстановы ў цэлым, але і для кожнага члена навучэнскага і педагагічнага калектыву, - мяркуе С.У.Шышына.

- Паспяховы кіраўнік павінен глядзець наперад і бачыць канкрэтныя мэты сваёй работы, прымаць правільныя рашэнні, не баяцца вялікай нагрузкі і адказнасці, дзейнічаць рашуча і заўсёды завяршаць справу перамогай. Эфектыўны кіраўнік вызначае высокія ўнутраныя стандарты прафесійнай дзейнасці і чакае таго ж ад падначаленых, - лічыць А.П.Юшчук.

- Практыка паказвае, што поспехі і няўдачы залежаць найперш ад кіраўніка. Галоўнае ў яго рабоце – умела ўплываць на падзеі і працэсы адукацыйнага працэсу, мабілізуючы калектыў на высокія вынікі. А калі да гэтага дадаць любоў да справы і жаданне зрабіць установу яшчэ лепшай – поспех абавязкова прыйдзе, - упэўнены В.В.Нагурны.

- Толькі той чалавек шчаслівы, які займаецца любімай справай. Я шчаслівы, бо знайшоў яе і прысвяціў ёй жыццё, - прызнаецца М.В.Новак.

- Асноўная мэта маёй работы – прафесійнае станаўленне і развіццё калектыву, паспяховае авалоданне навучэнцамі неабходнымі ведамі, уменнямі і навыкамі, задавальненне патрэб грамадства і дзяржавы ў кваліфікаваных кадрах, - гаворыць С.Ф.Палхоўскі.

Па выніках усіх конкурсных выпрабаванняў лепшым дырэктарам стала С.У.Шышына з Баранавіцкага дзяржаўнага ПТК сферы абслугоўвання. На 2-м месцы – В.В.Нагурны з Абласнога аграрна-вытворчага прафесійнага ліцэя Драгічына, на 3-м – А.П.Юшчук з Кобрынскага дзяржаўнага політэхнічнага каледжа. Педагагічны стаж пераможцаў конкурсу – 39, 41 і 18 гадоў адпаведна. Фіналісты атрымалі грашовыя прэміі і каштоўныя падарункі.

- У сістэме прафесійнай адукацыі Брэстчыны шмат таленавітых кіраўнікоў, здольных з дапамогай сваіх калектываў паспяхова вырашаць актуальныя задачы не толькі сённяшняга, але і заўтрашняга дня, - адзначыў А.Ф.Жук.

Сяргей ГРЫШКЕВІЧ.

НА ЗДЫМКУ: фіналісты конкурсу.

Фота аўтара.