Покліч душы

- Як правіла, валанцёрамі становяцца юнакі і дзяўчаты з актыўнай жыццёвай пазіцыяй, якія не могуць прайсці міма чужой бяды і жадаюць прыносіць карысць іншым. Ёсць і тыя, хто становіцца валанцёрам, каб быць у цэнтры грамадскіх падзей і наладжваць новыя зносіны. Валанцёрам нельга стаць пад прымусам і неўсвядомлена. Гэта покліч душы, - гаворыць намеснік дырэктара па выхаваўчай рабоце гімназіі Ляхавіч Аксана Віктараўна Гатоўчыц.

Развіццю валанцёрскага руху ў нашай краіне ўдзяляецца шмат увагі. Валанцёрства – гэта добрая школа сацыяльнага станаўлення і адаптацыі моладзі, якая дазваляе раскрыць станоўчы патэнцыял і творчыя магчымасці кожнага, сфарміраваць лідарскія якасці, навучыцца навыкам супрацоўніцтва.

На працягу некалькіх гадоў у гімназіі Ляхавіч дзейнічае валанцёрскі атрад “Пошук” Беларускага таварыства Чырвонага Крыжа. Мэта работы атрада заключаецца ў развіцці ў вучняў высокіх маральных якасцей. Юнакі і дзяўчаты прапагандуюць ідэі здаровага ладу жыцця, добраахвотнай працы на карысць грамадства, актыўнага ўдзелу ў сацыяльных, экалагічных, гуманітарных, культурна-адукацыйных і асветніцкіх праектах. Гэта дазваляе вучням самарэалізавацца, раскрыць і ўмацаваць унутраны патэнцыял.

- На першым пасяджэнні атрадаўцы выбіраюць актыў і складаюць план работы на год, які можа карэкціравацца, - расказвае Аксана Віктараўна. – Асноўнымі напрамкамі дзейнасці пошукаўцаў з’яўляюцца арганізацыя і правядзенне розных маладзёжных і дабрачынных акцый, добраўпарадкаванне памятных мясцін, дапамога ва ўсебаковым развіцці вучняў і фарміраванні ў іх актыўнай жыццёвай пазіцыі, далучэнне равеснікаў да дзейнасці, звязанай з прафілактыкай шкодных звычак, захаваннем уласнага здароўя і аховай навакольнага асяроддзя.

Валанцёры ўдзельнічаюць у штогадовых акцыях “Моладзь за чысціню гарадоў і сёл”, “Асенні марафон”, “Дапаможам перажыць зіму” і “Мы – за бяспеку”. Падчас іх гімназісты добраўпарадкоўваюць розныя тэрыторыі, дастаўляюць сельскагаспадарчую прадукцыю пажылым людзям і інвалідам дадому, вырабляюць буклеты па праблемах пажарнай бяспекі і распаўсюджваюць іх сярод насельніцтва.

Адным з важных напрамкаў работы атрадаўцаў з’яўляецца прапаганда здаровага і бяспечнага ладу жыцця. Штогод у рамках тыдня бяспекі дарожнага руху сацыяльныя педагогі, педагогі-псіхолагі, валанцёры і супрацоўнікі ДАІ праводзяць акцыю “Сябруюць на планеце вадзіцелі і дзеці”. Удзельнікі акцыі ўручаюць вадзіцелям памяткі ўласнага вырабу з напамінам аб выкананні правіл дарожнага руху.

Даволі цікавай і карыснай з’яўляецца акцыя “Мяняем цыгарэту на цукерку”. Валанцёры актыўна агітуюць равеснікаў і дарослых за адмову ад тытуню, інфармуюць іх аб шкодным уздзеянні яго на здароўе.

Штогод у гімназіі ладзіцца месячнік міласэрнасці, у рамках якога ў бібліятэцы арганізоўваецца выстава “Дарогай дабра, міласэрнасці, узаемаразумення”. На ёй выстаўляюцца кнігі, якія вучаць быць добрымі людзьмі, гатовымі ў любы час прыйсці на дапамогу. Акрамя таго, у межах месячніка праходзіць дабрачынная акцыя “Рабі дабро!”, падчас якой вучні 5 – 9 класаў прапаноўваюць набыць кандытарскія вырабы, зробленыя ўласнымі рукамі. Атрыманыя грошы ідуць на набыццё неабходнага абсталявання для выхаванцаў ЦКРНіР.

Кожную вясну валанцёры праводзяць тыдні дабра. Іх мэта – дапамога ветэранам і людзям пажылога ўзросту. Падчас сустрэч яны дзеляцца цікавымі ўспамінамі, якія гімназісты занатоўваюць.

Напрыканцы навучальнага года ладзіцца дэкада грамадзянска-патрыятычных спраў “Мы ў памяці захоўваем імёны герояў”. У госці да гімназістаў прыходзяць удзельнікі клуба “Сівізна”.

Сёння атрад рэалізоўвае праект “Тэатр без межаў”, які прадугледжвае стварэнне аб’яднання па інтарэсах тэатральнай накіраванасці “Вясёлка” для сумесных спраў валанцёраў, дзяцей-інвалідаў і іх бацькоў. Дзейнасць вучняў накіравана на сацыякультурную рэабілітацыю дзяцей з абмежаванымі фізічнымі магчымасцямі. У рамках праекта арганізоўваюцца спектаклі, праводзяцца заняткі з псіхолагам ЦКРНіР.

Мэта праекта “Моладзь і бяспечныя паводзіны” заключаецца ў прафілактыцы ВІЧ-інфекцыі, павышэнні ўзроўню інфармаванасці насельніцтва, у тым ліку дзяцей і моладзі, па праблеме ВІЧ/СНІДу. Заняткі праходзяць у інтэрактынай форме па прынцыпе “роўны навучае роўнага”.

- Валанцёрская дзейнасць адыгрывае вялікую выхаваўчую ролю. Юнакі і дзяўчаты атрымліваюць задавальненне ад карыснай і важнай работы, рэалізоўваюць сябе ў ёй, набываюць сяброў, цікава праводзяць час, атрымліваюць новыя веды і навыкі, пашыраюць кругагляд, - падагульняе Аксана Віктараўна.

Сяргей ГРЫШКЕВІЧ.